K.O.

Wow das isch en Tag gsi gestert brrrrrrrrr....mir sind am 9ni scho i de Badi gsi, wobi es isch also na ziemlich chalt gsi...s erschte wo mir gmacht händ isch d Kafimaschine igschaltet :-) die hät au tapfer mitgmacht, allerdings hämmer dänn welle s Reinigungsprogramm starte und hey, das isch e echti Useforderig gsi. Mir händ so ziemlich jede Chnopf druckt und nach es paar Versüech isch

es dänn gange:-)

Gliechzitig hämmer au d Abwäschmaschine welle ufstarte, aber die isch eifach nöd heiss worde! Ich ha mich dänn emal ad WC gmacht und die entstaubt und entchalcht wo ich plötzlich d Susi ghört ha schreie uiuiui bin sofort id Chuchi grennt und ha gseh wie d Abwäschmaschine ganz viel Schum usegspeuzt hät :-)

D Susi und ich händ dänn verzwieflet de Boiler gsuecht, aber i dere ganze Alag hämmer nüt gfunde hmmm komisch. Mir händ dänn Hilf übercho vom Vater vo de Susi, aber au de hät nach eme Zitli nüme wietergwüsst und drum hämmer am Abegg Hustechnik Service aglütet. De Herr Pfister isch grad am Namittag id Badi cho und hät sich die Rohr emal aglueget.

I de Zwüschetzit isch es immer schöner worde verusse und dänn sind 4 Ladies verbicho und händ tatsächlich 4 Kafi bstellt juhuuuu Euse 1. Verchauf. D Susi hät na ganz en feine Chueche bache und chum sind die 4 Dame wieder gange, sind d Herre vo de Gmeind cho wo unter anderem Rase mähet und Eus echli under d Ärm grieffet. Dene hämmer natürlich au en Kafi und echli Chueche geh, die müend ja schliesslich bi Chräft bliebe hihihi

De Herr Pfister hät dänn usegfunde, dass de Boiler ( jaaaa er hät en gfunde, juhuuuu) vermuetlich verchalcht isch und er isch wieder gange zum es paar Ersatzteili z bstelle.

Mir händ dänn am Servicetechniker vo de Abwäschmaschine aglütet und de meldet sich sobald er öpper cha schicke...

Nach dem Durenand hämmer Eus au en Kafi gmacht und sind echli id Sunne use ghöcklet. Mir händ Euses Rettigsschwümmkursbüechli mitgnoh und händ d Befreiigsgriff welle üebe. Allerdings simmer genau bis zum erschte Griff cho, wo scho eine vo de Gmeindsherre cho isch und gseit hät: Hey Ihr müend nöd striete, das chunnt scho guet! Hihihi mir händ scho müesse lache, die händ gmeint mir kämpfet mitenand :-)

Gege de Abig hämmer dänn na d Palme befreit und jetzt bruchet die unbedingt echli Sunne..

Ojemine dänn isch wieder s Schwümmtraining uf em Plan gstande und mir sind tapfer am halbi 8ti in Richti atrabet.... z erscht hämmer müesse je 6 längene Schleppe und dänn isch es an Prüefigsparcour lerne gange..phuuuuuuu das isch Schinderei! Mir sind grad echli an Aschlag cho. Mer muess z erscht 90m Durschwümme, dänn 10m tauche, de Verletzti ufehole, an Beckirand drucke zum beatme und wämmer de dusse hät muemmer d Herzmassage mache...heieiei isch das en Chrampf gsi...Vor allem das us em Wasser zieh! Mir händ ja Eus selber scho nöd usebracht und d Susi und ich händ das versuecht z üebe...guet isch d Greenpeace nöd det gsi, die hättet sicher gmeint dass 2 Walfisch gstrandet sind:-)

De Fräse hät au ziemlich müeh gha mit de Kondition, aber er hät tapfer durebisse. Er hät au super chönne d Herzmassage mache und sin Verletzte het 100% überlebt :-)

Am Schluss hämmer dänn na e Rettigschetti gmacht. Da hebt mer sich i einere Reihe a de Händ und dänn git eine s Komando das mer muess abtauche und nach 2 Schwümmzüg wieder ufecho. Das macht mer dänn die ganz Längi, damit mer alles am Grund findet.

Nach dem Training simmer also total erlediget gsi und sind wie Herdöpfelsäck is Chörbli gheit :-)